NANINIWALA AKO SA KASABIHANG…

15 01 2014

Sari-saring mga kasabihan na siguro ang ating mga narinig. Ang ilan dito ay naisama na rin natin sa ano mang kasabihan ang pinaniniwalaan natin pero ang ibang kasabihan ay inililibing na lamang natin sa lupa katulad ng mga ito:

  • Naniniwala ako sa kasabihang ang puso kapag nasaktan hindi nadadala, magmamahal ulit.
  • Naniniwala ako sa kasabihang walang asong magaling sa pusang gutom.
  • Naniniwala ako sa kasabihang ang blusang itim kapag isinuot blusang itim parin.
  • Naniniwala ako sa kasabihang inaagaw ang mahal mo kaya ingatan mo siya baka maagaw ng langaw.
  • Naniniwala ako sa kasabihang maraming namamatay sa maling pag-gamit ng AK47.
  • Naniniwala ako sa kasabihang walang mainit na sabaw sa taong uhaw na uhaw.
  • Naniniwala ako sa kasabihang pumuti man ang buhok ko huwag lang mga mata ko kakahintay sa mga taong hindi sumisipot sa tamang oras na napagusapan.
  • Naniniwala ako sa kasabihang nabubuhay ka sa mundo para sa isang layunin…… na masama.
  • Naniniwala ako sa kasabihang walang magandang babae sa mabagal na internet.
  • Naniniwala ako sa kasabihang may pera sa basura ng mga bilyonaryo.
  • Naniniwala ako sa kasabihang mabilis kang kumilos kapag taeng-tae ka na.
  • Naniniwala ako sa kasabihang walang taong payatot sa tabi ng mas payat pa sa kanya.
  • Naniniwala ako sa kasabihang ang alak ay isang inumin lamang.
  • Naniniwala ako sa kasabihang walang taong demonyo, ugaling demonyo lang.
  • Naniniwala ako sa kasabihang hindi lahat nakakaintindi ng joke. Joke lang.
  • Naniniwala ako sa kasabihang kahit matanda ka na may asim parin yung mukha mo kapag nakakakain ng mangga.
  • Naniniwala ako sa kasabihang dapat bigyan ng kulay ang mundo, magvandalize ka kung saan-saan.
  • Naniniwala ako sa kasabihang kahit may pera kung wala ka namang kaibigan at least may pera ka parin.
  • Naniniwala ako sa kasabihang lahat ng tao may maitim na kulay lalo na yung singit mo.
  • Naniniwala ako sa kasabihang walang teacher na terror sa estudyanteng walang pakialam sa kanya.
  • Naniniwala ako sa kasabihang kapag tumibok ang puso wala ka nang magagawa kundi sundin ang payo ng mga magulang mo na iwanan ang kasintahan mo.
  • Naniniwala ako sa kasabihang hindi ako magaartista baka mawalan ng trabaho si Daniel Padilla.
  • Naniniwala ako sa kasabihang walang taong galit sa taong wala namang ginagawang masama.
  • NahNiNiWalla aQ $a kASaBHiehang WuLang Jejemon, ajejeje
  • Naniniwala ako sa kasabihang walang multo dahil maraming taong buhay pa mukhang multo na.
  • Naniniwala ako sa kasabihang kapag hindi mo maipaliwanag ang lasang natikman mo ang tawag dito ay “lasang alien”.
  • Naniniwala ako sa kasabihang walang pinipili ang mga hindi choosy.
  • Naniniwala ako sa kasabihang mabubuhay tayo sa mundong may oxygen.
  • Naniniwala ako sa kasabihang luluha ka sa saya kapag nakakita ka ng pusang nagigitara.
  • Naniniwala ako sa kasabihang ang estudyanteng masipag ay bumabagsak parin. Kaya huwag umasa.
  • Naniniwala ako sa kasabihang lumiliit ang isang bagay kapag hindi ginagamit. Gamitin mo na yan baka lumiit yan sige ka hindi ka magkaanak niyan.
  • Naniniwala ako sa kasabihang kung ayaw mong masaktan pero gusto mong manakit maging writer ka nalang.
  • Naniniwala ako sa kasabihang dapat tigilan na itong mga kasabihan na ito.
  • Naniniwala ako sa kasabihang huwag maniwala sa mga kasabihan, sabi-sabi lang yan.

—————————————————————————-
Lahat tayo may kasabihan sa buhay ano man ang kasabihan na yan sana ay mapanindigan natin.

Nakalahati na natin ang unang buwan ng taon, kumusta New Year’s Resolution mo?

I am on twitter: @olops001





DALAWANG WALA ISA TATLO (2013)

31 12 2013

Goodbye 2013, Hello 2014

ANG bilis ng panahon, bagong taon nanaman. Parang kahapon lang nagsulat ako ng mga New Year’s Resolution sa taong 2013. Ngayon hindi ko ito babaguhin kaya ito parin ang iba’t ibang mga New Year’s Resolution.

New Year’s Resolution

  • Mag papapayat na ako, kapag wala ng makain.
  • Hindi na ako manloloko ng tao. Joke.
  • Hindi na ako mangangako. Promise!
  • Pupunta na ako sa Gym! Pero di ako mag bubuhat. Bakit kapag pupunta ng Gym magbubuhat agad? Pwede namang Treadmill lang ah.
  • Hindi na ako mambobola ng mga babae. Manchechess nalang.
  • I won’t do conyo talking na. Like forever promise, I swear. Many tao don’t like it kasi eh.
  • I won’t procrastinate anymore, I’ll do it tomorrow nalang.
  • hInD3 nah aKu maGiGinG J3J3m0n ajejejeje
  • Hindi muna ako mag gigirlfriend, boyfriend naman.
  • Hindi na ako sasali sa mga gang, puro away naman hilig nun eh. Ui wait may nagyayaya nanaman ng gang war, sasali lang ako.
  • Hindi na ako mangungulangot sa classroom.
  • Bilang isang guro magiging mabait na ako sa mga estudyante ko, di ko na sila bibigyan ng assignment. Pero araw-araw parin ang quiz nila.
  • Hindi na ako mamimigay ng papel sa mga kaklase ko. Ang pera natin hindi basta basta mauubos! Pero ang Yellow Pad ko, konting konti nalang!
  • Mag tatayo ako ng business, Monkey Business.
  • Gugugulin ko oras ko sa mga ball games like Jackstone.
  • Papayaman ako, tataya ako lagi ng Lotto
  • Dapat wala na akong New Year’s Resolution eh kasi katapusan na daw ng mundo noong December 21,2012.
  • Ipapasa ko yung mga subjects ko, first step ay I-drop ko muna sila. Wala na kasing pagasa na makabawi pa.
  • Magtitipid na ako, sa 2016.
  • Mag papaganda ako, kakapalan ko makeup ko.
  • Reading, I’ll make it a habit. Pero di ko sinasabi na dapat intindihin ko binabasa ko ah.
  • Hindi na ako maniningil ng mataas na pamasahe sa tricycle ko, daig ko pa kasi nanghoholdap nun eh.
  • Maliligo na po ako araw-araw.
  • Titigilan ko na ang mga bisyo ko, maliban sa paginom, paninigarilyo at pagdodota.
  • Di na ako magsusugal, kung walang pera.
  • New Year’s resolution pa, eh hanggang February lang naman yung effect nung sa akin.
  • New year’s resolution ko hindi ako gagawa ng New year’s resolution.

THIS YEAR…

I won 3rd place in News Writing (Filipino) and 10th place in Editorial Writing (Filipino)

I met my twin

I rode a bike

and a time machine

I deleted some of my messages

ate some burgers

and burgers again

I went to Palawan

I met the girl who changed my life

she’s happy with me

and she met my mom and my sis

PERSONAL

Maraming salamat sa nagdaang isang taon. Hanggang sa susunod! Mabuhay!

————————————————————————–
Kalimutan ang mga masasamang ala-ala noong nakaraang taon. Baunin ang mga magagandang ala-ala at dalhin sa mga susunod pang taon. — Eler Villegas

HAPPY NEW YEAR!

I am on twitter: @olops001





HAPPY HOLIDAYS!

24 12 2013

Parang natulog lang tayo tapos pagkagising pasko nanaman.
Salamat sa lahat ng bumisita sa aking blog ngayong taon.
Hanggang sa susunod na taon. Mabuhay kayo!
Maligayang Pasko sa inyong lahat!

 

 





Protected: LOVE LETTER #1

30 11 2013

This content is password protected. To view it please enter your password below:





HAPPY HALLOWEEN!

31 10 2013

Noong bata ako takot na takot ako sa mga multo kahit na hindi pa naman ako nakakita ng kahit isa. Naging parte kasi ng pagpapalaki ng mga magulang ko na takutin ako na may multo para lang maging mabait akong bata. Effective naman, maaga palang natutulog na ako dahil sabi nila kapag hatinggabi na naglalabasan na ang sari-saring nilalang na pwedeng kumain sa akin. Ayaw ko ngang maging hapunan ng mga ito!

Naaalala ko pa ang “Magandang Gabi Bayan” ni Noli De Castro kapag halloween special nito. Sobrang galing nila gumawa ng mga documentaries about sa mga kababalaghan at bilang bata takot na takot naman ako. Nakapikit pa ako at sumusulyap-sulyap nalang sa palabas na iyon dahil kahit hindi ko masyado pinapanuod ay natratrauma na ako.

Kapag inuutusan akong kumuha ng ketchup sa ref namin na nasa first floor ng bahay namin ay dahan-dahan akong bababa ng hagdan na may kasamang iyak at uhog dahil akala ko may mga monsters na sasakmal nalang sa akin. Mabilis din akong aakyat pabalik dahil baka hinahabol ako ng mga taong kumunoy. Pero ang mas kinakatakot ko ay bakit ako inuutusan kumuha ng ketchup sa ref. Para saan?

Malaki talaga ang naging epekto sa akin ng mga pananakot na ito at kalahati ng buhay bata ko ay naniwala ako na may mga kababalaghan sa paligid na susugat sa akin at may lalabas na kanin mula sa sugat ko. Kahit na nakacostume lang na tao takot parin ako. Sa madaling salita takot ako sa mascot. Oo, kahit kay Jollibee takot ako. Noong kinder ako dumalaw siya sa school namin yung teacher namin sinabihan kami na may special na bisita kami at bumilang siya hanggang sampu. Lumabas ang kinatatakutan kong bubuyog at naghiyawan ang mga kaklase ko at nagtakbuhan papunta sa kanya. Hindi ko siya pinansin naiwan ako sa kinauupuan ko habang yung mga kaklase ko sayang-saya na nandun siya.

Takot din ako sa taong grasa. Bukod sa madumi sila pakiramdam ko noon kikidnapin nila ako at ibebenta ang mga laman-loob ko sa palengke. Kailan ko lang nalaman na hindi mo kailangang maging taong grasa para kumidnap ng bata at walang binebentang laman-loob ng tao sa palengke.

Takot ako sa uod at bulate. Maglagay ka ng tissue sa sahig at sabihin mong inilagay mo dun yung bulate na galing sa pwet mo hindi na ako bababa pa sa kama ko. Hindi ko alam pero sobrang nakakapangilabot kapag nakakakita ako ng mga ito. May mga pakakataon na masasabi ko nalang sa sarili ko na ang duwag-duwag ko at nagpaniwala ako sa mga bagay na ipinapanakot sa akin ng mga matatanda noon.

Matanda na ako ngayon nalaman kong hindi naman pala dapat kinakatakutan ang ibang bagay. Kailangan mong maging matapang para makausad sa buhay. Kadalasan ang takot ang nagpapalakas sa iyo para malampasan ang mga mahihirap na pangyayari sa buhay.

Hindi ko alam kung totoo ba talaga na may multo pero ang mahalaga hindi pa ako nakakita. Natakot man ako sa mga palabas sa telebisyon tuwing nalalapit na ang araw ng mga patay pero nalinawan ako na ano nalang ang buhay kung walang entertainment na katulad nito. Ngayon napakasayang manood ng mga horror at ang sarap din palang takutin ang sarili paminsan-minsan.

Natutunan kong tumakbo kung kinakailangan at huwag magpauto sa mga nakakatanda kung nagpapakuha sila ng ketchup na hindi ko naman alam kung para saan nila gagamitin. Nalaman kong tao lang pala ang nasa loob ng mga mascot at init na init sila sa loob nito. Nabanggit ko pa ang Jollibee kahit hindi naman nila ako binayaran para i-advertise ito.

Naintindihan ko ang hirap ng buhay, na imbis na katakutan ang mga taong grasa dapat silang tulungan dahil nangangailangan sila ng kalinga. Araw-araw silang nakikipagsapalaran para lang mabuhay. Madumi man pero kapwa tao mo rin sila. Naging mas maingat ako dahil hindi nawawala ang mga masasamang loob. Baka nandiyan lang sila nag-aabang para kidnapin ka at gawing rekado ang laman-loob mo sa pagkain.

Ang uod nakakatulong pala sa kalikasan bakit kailangan matakot? Wala namang ngipin yan. Ang bulate napupuksa ng gamot kaya huwag na natin talakayin pa nangingilabot ako eh.

——————————————————————————————————
Fear makes us feel our humanity.”
~ Benjamin Disraeli

HAPPY HALLOWEEN! 

[Photo Courtesy of Vipee Gamotia Flores]

I am on Twitter: @olops001





IDEAL WOMAN

30 09 2013

Nangangarap tayo sa buhay, isa sa mga pangarap natin ang makatagpo tayo ng lalaki o babae na gusto natin. Yung pasok sa ating mga standards. Sabi nila swerte kapag ang nakatuluyan mo ay yung pinapangarap mo talaga, pero minsan naisip ko na parang napakaimposible na magkaroon ng lahat ng katangiang ito sa isang babae.

Lalaki ako, siyempre ang ilalagay ko yung ideal woman ko. (Kakaiba naman kung ideal man pa ang ilalagay ko).

Ideal woman ko siyempre mabait. Sino ba namang may gusto ng mala-terorista na babae. Kasing amo niya sana yung pusa sa bahay namin, pero sana hindi tumatae sa sahig.

Mahinhin pero malakas ang dating, yung tipong kapag naglalakad ay mararamdaman mo ang confidence niya sa sarili niya, na alam niya na maganda siya, na may nagmamahal sa kanya na katulad ko. Korny.

Gusto ko magaling magluto, yung hindi ako gugutumin kapag kasama siya. Kahit hindi chef pero magaling sa kusina. Gusto ko marunong din magluto ng exotic foods tulad ng ginisang pigsa.

Gusto ko matalino kasi minsan hindi ako nagiisip ng tama, gusto ko ng babaeng iisipin ang mas nakakabuti sa aming dalawa, ayaw ko ng padalos-dalos magdesisyon at kung darating sa buhay namin na mamimili siya kung anong kulay ang pwedeng ipalit sa itim na kulay ng buhok ko pagbibigyan ko siya. Kahit kulay Indigo pa.

Gusto ko yung babaeng matatanggap ako sa kahinaan ko. Yung babaeng susuportahan ako sa mga bagay na gusto ko. Yung kahit na ang pangit-pangit ko na dahil sa hirap ng trabaho nanjan parin siya. Yung kahit na lagi nalang akong talo sa sugal nanjan parin siya para hampasin ako ng troso. Yung kahit na binubugbog na ako ng problema sa buhay nanjan siya para salagin ito lahat dahil matibay siya, na gawa siya sa Titanium na hindi siya papayag na lahat ng problema ay papasanin ko.

Gusto ko ng babaeng kasama ako sa karamihan ng “first time” niya sa buhay. Kahit anong first time na pumasok sa isip mo sige yun na! Gusto ko mabango, may tamang personal hygiene. Ayaw ko ng makalat, nagtatapon sana siya sa tamang tapunan. Masinop at anal-retentive.

Yung kahit na sobrang tagal niya mag-ayos sa sarili niya ayos lang sa akin basta kaaya-aya siyang tignan. Kahit na late na kami sige lang paganda ka lang. Kahit na matutulog na kami sige lang paganda ka lang. Kahit na mag-aalmusal lang kami sige lang paganda ka lang. Kahit na sa phone ko siya kausap sige lang paganda ka lang. Basta kung saan ka masaya.

Sana may paninindigan siya sa buhay, yung may ipinaglalaban dahil sila yung mga taong nagiging matagumpay sa buhay. Gusto ko ng babaeng hindi manlulumo sa sarili niya dahil tumataba na siya. Gusto ko ng babaeng kapag nakikita niyang tumataba na siya mag woworkout siya imbes na maginarte na “eeeeehh tumataba na akoooo”. Yung babaeng hindi natatakot kumain ng kumain dahil alam niyang maganda siya kahit na tumataba siya. Yung babaeng tamang trip lang hindi mabisyo, masayahin at yung kayang tumayo sa sariling mga paa niya.

Gusto ko yung aalagaan ako kahit na sobrang malala na ang sakit ko, na kahit kinukuha na ako ng liwanag nanjan parin siya nakahawak sa mga kamay ko. Pangarap ko na kapag nauna akong mamatay sa kanya ako na ang last niya pero bukas parin ako sa posibilidad na kapag nahulog ang loob niya sa iba kapag wala na ako ay tatanggapin ko ito dahil yun ang makakapagpasaya sa kanya.

Gusto ko yung tunay, may tiwala sa akin at handang gawin ang lahat mapanatili lang ang relasyon namin na matibay at hindi basta-basta maitutumba ng hangin. Yung hindi maarte at madrama at madaling magpatawad.

Physical Appearance? Hmmm hindi na siguro importante yan. Kasi ugali naman ang nagpapaganda sa babae.

May mga pangarap tayo sa buhay pero naniniwala ako na kahit wala yung mga katangian na hinahanap mo sa kanya kapag yan binigay sa iyo ni Lord mamahalin mo siya.

—————————————————————————————-
The definition of a beautiful woman is one who loves me.
~ Sloan Wilson

AUGUST 14 – My Blog’s Anniversary
MARAMING MARAMING SALAMAT PO!

I am on Twitter: @olops001





SILID-ARALAN

8 08 2013

failing-at-cro

Natanggap ko na ang resulta ng mga exams ko. Karamihan bagsak!

Pinipilit kong tumawa nalang para naman kahit papano maibsan ang lungkot na nararamdaman ko. Mahirap talaga yung mga subjects na kahit anong pagsisikap mo na makapag-review ay babagsak ka parin. Minsan matatanong mo nalang sa sariili mo, “Bakit ganito? Ganito ba talaga ako kabobo?”

Minsan iisipin mo kung ano ba talaga ang mali, sa sarili mo nga ba o sa ibang bagay. Minsan sinisisi natin ang mga teachers kung bakit ganun sila magturo. Naiinis ka sa kung papaano siya magbigay ng exam. Minsan sinisisi mo yung internet niyo dahil hindi ka nakapagreview kakagawa ng kung ano-ano sa harapan ng kompyuter.

Pero sa huli malalaman mong ikaw mismo ang mali. Hindi pa sapat yung effort na ibinibigay mo para makuha mo yung gusto mo. Minsan talaga kailangan mo ring makarinig ng masasakit na salita sa teacher mo para magising ka sa katotohanan. May mga tao na mataas ang expectation sa iyo dahil sa katayuan mo sa buhay. Pero sana maintindihan nila na hindi ka magaling sa lahat ng bagay.

Nandito na ako sa point na nawawalan na ako ng pag-asa. Pero sinusubukan ko paring bumangon, sinusubukan kong bumawi at lumugar sa tama. Sabi nga nila “madadapa ka muna bago ka matutong lumakad”.

Minsan ayoko na mag-aral pero masaya ako kapag pumapasok ako sa school, masasaya mga tao at may tawanan lagi, nakakalimutan ko mga problema ko. Ang isang klase ay binubuo ng mga estudyante na may kanya-kanyang istorya sa buhay. Magkakaiba ang ugali, paniniwala at opinyon pero kayang bumuo ng isang matinding samahan. Pero kung anong nakikita niyo sa loob ng silid-aralan ay ibang-iba sa buhay nila paglabas ng eskwelahan.

May mga estudyante na malalaki ang problema sa pamilya pero sila pa ang magagaling magpatawa sa klase. May ilan na kahit may sakit na itinatago nakakayanan pang mag-excel sa lahat ng subjects. May mga mahihirap pero nagagawan nila ng paraan upang makabayad sa pagpapa-photocopy ng handouts nila.

Hindi natin sila pwedeng husgahan sa ano mang nakikita natin sa kanila sa loob lamang ng silid-aralan. Malay mo kaya pala siga yung kaklase mo dahil kapag nasa bahay siya binubugbog pala siya ng tatay niya. Yung kaklase mo kaya pala malandi dahil hinahanap lang niya ang pagmamahal na hindi naibibigay sa kanya ng kanyang mga magulang. Yung kaklase mong ubod ng likot malay mo may sakit siya at bilang nalang ang mga araw niya sa mundo. Baka nga may ibang mga tahimik lang sa klase pero holdaper pala sa gabi.

Pero iba-iba man ang estado sa buhay, nasa eskwelahan tayo para mag-aral. Kung pumasa salamat kung bumagsak kawawa. Kaya matutong mag-adjust. Intindihin mo nalang din ang mga taong hindi nakakaintindi sa iyo. Minsan magka-iba talaga ang pinaniniwalaan niyo at darating sa punto na kailangan mo nang hayaan nalang siya kung saan siya masaya.

Tulungan mo sarili mo kung nahihirapan ka na. Huwag kang papadala sa lahat ng taong sumisira sa iyo. Ituloy mo lang ang buhay mo. Huwag mawawalan ng pag-asa. Maging masaya sa pag-aaral, dahil kung hindi ka masaya sa pag-aaral mo ngayon nasasayang lang ang oras mo sa buhay.

—————————————————————————-
Education is the ability to listen to almost anything without losing your temper or your self-confidence.
– Robert Frost

HAVE A GREAT WEEKEND!

I am on Twitter: @olops001

[Photo: Tweaky Blog]








Follow

Get every new post delivered to your Inbox.

Join 135 other followers

%d bloggers like this: